記得以前去甘肅青海旅遊個陣，都會見到馬踏飛燕嘅標誌，馬踏飛燕就好似中國西北絲綢之路線嘅代表，咁馬踏飛燕到底為何物呢？

馬踏飛燕叫銅奔馬，係1969年响甘肅武威雷台古墓出土嘅一件青銅器，係現時中國禁止出境嘅64件文物之一。專家根據青銅馬上銘文，得知古墓主人係東漢南陽析侯張江同佢家族。張江當時戍守張掖峽口，西羌攻打涼州進兵來犯，因戰功而獲封為「破羌將軍」，據估計呢隻銅奔馬仿製馬援奉俾漢光武帝劉秀嘅「相馬式-銅奔馬」而成，用嚟上貢漢明帝，自己就留咗一隻。

而呢隻銅奔馬之所以叫馬踏飛燕，據講係同郭沫若有關。話說郭沫若同外賓去到甘肅省博物館見到呢件銅奔馬時，就話係一流嘅藝術珍品，仲幫隻馬改個名做馬踏飛燕。不過，問題嚟喇！唔少研究都話銅奔馬踩住嘅根本唔係飛燕，估計只係一隻飛鳥，代表「天馬」同跑得好快。但馬踏飛燕個名夠傳神，就沿用至今喇！

馬踏飛燕呢件國寶，可以反映到東漢時中原政權同西域邊疆嘅歷史，大家下次去甘肅行絲綢之路，真係要睇多兩眼。